Այսօրվանից որոշ սահմանափակումներ վերացվում են Վրաստանում

ԵՐԵՎԱՆ, 27 ԱՊՐԻԼԻ, Panorama.am: Այսօրվանից Վրաստանում թույլատրվելու է երթևեկել թեթև մարդատար ավտոմեքենաների միջոցներով, նաև կգործեն տաքսիները: Կրկին թույլատրվում են առցանց գնումները: Կգործեն ցանկացած արտադրանքի և բաց տիպի ագրարային շուկաները։ Այս մասին, ինչպես գրել է վրացական Առաջին Ալիքը, հայտնել է Վրաստանի վարչապետի մամլո խոսնակ Իրակլի Չիքովանին:

Վարչապետի խոսնակը բացատրել է, որ այդ սահմանափակումները կվերացվեն ամբողջ երկրում, բացառությամբ այն մարզերի և վարչական ստորաբաժանումների, որտեղ գործում են խիստ կարանտինի սահմանափակումներ:

«Միևնույն ժամանակ, պետք է շեշտել, որ այս ամենը վերաբերում է այն ընկերություններին և հաստատություններին, որոնք համապատասխանում են Առողջապահության նախարարության կողմից մշակված կանոններին», – ասել է Իրակլի Չիքովանին:

Դրա հետ մեկտեղ, ինչպես հայտնի է, ապրիլի 15-ի ժամը 21:00-ից արտակարգ դրության պայմաններում արգելվում է մուտք գործել Թբիլիսի, Ռուսթավի, Բաթումի և Քութայիսի և լքել այդ քաղաքները:

Այնուամենայնիվ, ապրիլի 27-ին և 28-ին, որպես բացառություն, թույլատրվում է մուտք գործել այս խոշոր քաղաքներ և լքել այդ քաղաքները գրանցման վայր վերադառնալու նպատակով:

Միևնույն ժամանակ, Իրակլի Չիքովանին նշել է, որ համաճարակաբանական իրավիճակի վերլուծության հիման վրա վերացված սահմանափակումները կարող են կրկին սահմանվել, ինչպես նաև հնարավոր է վերանայվի յուրաքանչյուր հաջորդ փուլի ժամկետը:

«Արտակարգ դրության պայմաններում կիրառված բոլոր մյուս սահմանափակումները մնում են ուժի մեջ: Դրանց թվում, կրկին գործում է պարետային ժամը՝ 21: 00-ից մինչ 06: 00-ն: Նաև մենք կցանկանայինք նշել, որ համաճարակաբանական իրավիճակի վերլուծության հիման վրա հնարավոր է վերացված սահմանափակումները կրկնվեն, ինչպես նաև հնարավոր է վերանայվեն յուրաքանչյուր հաջորդ փուլի ժամկետները», – ասել է Իրակլի Չիքովանին: