ԱՄՆ-ը սպասում է, որ Չինաստանը թույլատրի արտասահմանցի փորձագետների մուտքը Ուհանի լաբորատորիա
Նմանատիպ
ԵՐԵՎԱՆ, 18 ԱՊՐԻԼԻ, Panorama.am: Վաշինգտոնն ակնկալում է, որ Չինաստանի իշխանությունները կթույլատրեն արտասահմանցի փորձագետների մուտքը Ուհանի լաբորատորիա, որտեղից, ըստ ամերիկյան մի շարք լրատվամիջոցների վարկածի, կարող էր սկսվել կորոնավիրուսի տարածումը: ՏԱՍՍ-ի փոխանցմամբ, այդ մասին ուրբաթ օրը Fox Business-ն հայտնել է ԱՄՆ պետքարտուղար Մայքլ Պոմպեոն:
«Մենք շարունակում ենք Չինաստանի Կոմունիստական կուսակցությանը խնդրել, որպեսզի թույլ տա մասնագետների մուտքը այդ վիրուսաբանական լաբորատորիա, որպեսզի կարողանանք պարզել, թե որտեղից է սկսվել տարածումը», – ասել է ԱՄՆ արտաքին գերատեսչության ղեկավարը:
Ըստ նրա, այդտեղ քաղաքականության հարց չէ, այլ՝ գիտության և համաճարակաբանության:
«Միանգամայն ընդունելի է, որ աշխարհն արդարացիորեն հարցեր է բարձրացնում»,- հայտարարել է Պոմպեոն՝ մեկնաբանելով ԱՄՆ ԶԼՄ-ների լուրերը, որոնք առանց որևէ ապացույցի հրապարակել են լաբորատորիայի հետ կապված մեղադրանքները:
«Չինական Կոմունիստական կուսակցությունը պետք է անկեղծորեն ասի իրողությունը, որպեսզի ամբողջ աշխարհը իմանա: Երբ նրանք անեն դա, կգա պատասխանատվության ենթարկելու ժամանակը, մենք կարող ենք ասել, թե ով ինչ է արել»,- ավելացրել է ԱՄՆ պետքարտուղարը:
Լրագրող Հյու Հյուիթի հետ հարցազրույցում, որի տպագիր տարբերակը հրապարակվել է ուրբաթ օրը, Պոմպեոն նաև ուշադրություն է հրավիրել այն փաստի վրա, որ արևմտյան երկրների մասնագետներին թույլ չեն տվել մուտք գործել այս լաբորատորիա:
Ըստ ԱՄՆ պետքարտուղարի, Առողջապահության համաշխարհային կազմակերպությունը պետք է պնդի, որպեսզի փորձագետներին թույլ տան մտնել կենտրոն:
Հինգշաբթի օրը Չինաստանի արտգործնախարարության խոսնակ ՉԺաո Լիցզյանգը հայտարարել է, որ կորոնավիրուսի արհեստական ստեղծման վարկածը չի հիմնավորվում որևէ ապացույցով: Այսպես է նա մեկնաբանել Fox News հեռուստաալիքի հրապարակումը, ըստ որի, կորոնավիրուսով «զրոյական հիվանդը», ենթադրաբար, եղել է Ուհանի լաբորատորիայի աշխատակիցը:
Չորեքշաբթի օրը նման հայտարարություն էր արել Fox News-ի լրագրողը՝ վկայակոչելով անանուն աղբյուրները:
Հրապարակման մեջ նշվում է, որ վիրուսը ենթադրաբար փոխանցվել է լաբորատորիայի աշխատակիցներից մեկին չղջիկից: Վարկածի համաձայն, այդ աշխատակիցը հետագայում վարակել է Ուհան քաղաքի բնակիչներին:
CNN-ը, վկայակոչելով սեփական աղբյուրները, ասել է, որ ԱՄՆ հետախուզությունը այլ վարկածների հետ մեկտեղ ստուգում է Ուհան քաղաքի լաբորատորիայից կորոնավիրուսի տարածման տարբերակը:
Հետևեք մեզ նաև Telegram-ում