Կարծիք հայտնելն ինչո՞ւ եք թշնամանքի վերածում, ես վստահ եմ, որ Փաշինյանն առաջինն է շնորհավորելու. Վիտալի Բալասանյան (տեսանյութ)

ԵՐԵՎԱՆ, 31 ՄԱՐՏԻ, Tert.am: Արցախի նախագահի թեկնածու Վիտալի Բալասանյանը քվեարկության գնացել էր ընտանիքով և քվեարկել է հանուն Արցախի անվտանգության և արդարության: «Ես դեռևս մարտի 15-ին, երբ ՀՀ-ում հայտարարվել էր արտակարգ դրություն, և քանի որ մենք գտնվում ենք մեկ տարածքում, ուր չկան պետական սահմաններ, միանշանակ ասել եմ, որ յուրաքանչյուր քաղաքացու առողջությունն ինձ համար ավելի կարևոր է, քան որ ես լինեմ նախագահ»,- լրագրողների հետ զրույցում ասաց նա՝ պատասխանելով կորոնավիրուսի վտանգի պայմաններում ընտրություններ անցկացնելուն:

Բալասանյանը նկատեց, որ Առողջապահության նախարարության հրահանագները, միջոցառումներն իրականացվում են, իսկ քաղաքացիների մասնակությունը բանականին ակտիվ է: «Մեր ժողովուրդն անվտանգության և Ղարաբաղի հարցն են շատ կարևորում»,-ասաց նա և նշեց, որ այս պահի դրությամբ բողոքներ չունեն:

Վիտալի Բալասանյանն ընտրություններին մարդկանց ակտիվությունը պայմանավորվեց նրանով, որ ժողովուրդը րոպե առաջ ուզում է ունենալ շատ ուժեղ կառավարիչ, գերագույն գլխավոր հրամանատար: «Մանավանդ՝ վերջին ժամանակները տեսնում ենք, որ Արցախի իշխանությունները գնալով թուլացել են. մեզ անհրաժեշտ է ունենալ ուժեղ նախագահ»,-ասաց նա:

Նախագահի թեկնածուն ասաց, որ բարեգործության անվան տակ եղել են ընտրակաշառքի փորձեր, ինչի մասին ահազանգել են, դիմել են նախագահին: «Այն ինչ կատարվել է մեզ մոտ՝ արձանագրված է, երբ ժամանակը գա, այդ մասին կբարձրաձայնենք»,-ասաց նա: Ինչ վերաբերում է մարդկանց պարտքերը մարելու միջոցով իր կողմից ընտրակաշառք առաջարկելու մասին լուրերին՝ նա դա համարեց ապատեղեկատվություն և ասաց, որ ինքը, սկսած խորհրդային տարիներից, կաշառք երբևէ չի ստացել: «Ես երբևիցե կաշառք չեմ ստացել, չեն առաջարկել, քանի որ իմ բնավորությունը գիտեն և կյանքում կաշառք տված չկամ»,-ասաց նա:

Վիտալի Բալասանյանը նկատեց, որ առաջին անգամ է Արցախում այսքան շատ թվով թեկնածու առաջադրվել, առաջին անգամ է, որ արևմտյան ուժերը շահագրգռված են Արցախի ընտրություններով: «Մենք արձանագրել ենք, որ այդ ուժերը ցանկանում են ունենան իրենց դրածո իշխանությունը և մեր ժողովուրդը դա թույլ չի տալու: Համոզված եմ, որ նրանք բոլորն իրենց ձայնը կտան անվտանգության երաշխավորին, որը ես եմ: Թող ինքնագովազդ չլինի, բայց ես ապացուցել եմ, որ ես եմ Արցախի ժողովրդի առաջին պաշտպաններից մեկը, հիմա էլ ևս մեկ անգամ կապացուցեմ»,-ասաց նա:

Նա նշեց, որ պատահական մարդ չէ Արցախում և իրենց տոհմը ճանաչված է:

Բալասանյանն ասաց, որ բնակիչներն իր հետ համաձայն են: «Մեր ժողովուրդը նյութապաշտ չէ, նրանք ժամանակ առ ժամանակ փորձում են սորոսական խմբերով, նյութական, բարեգործության քողի տակ… բայց մեր ժողովուրդը նյութապաշտ չէ: Կան սոցիալապես անհապահով ընտանիքներ, վստահ եմ, որ իշխանությունները պարտավոր էին տանիքները փոխել… այդ սոցիալական հարցերը լուծել, երեկ այդ մարդիկ պաշտոններ էին զբաղեցնում, հիմա պոպոլիզմով են զբաղվում, ինչպես Հայաստանում ժամանակին զբաղվել են քաղաքական որոշ դեմքեր»,-ասաց նա:

Ինչ վերաբերում է հաղթելու դեպքում ՀՀ իշխանությունների հետ համագործակցությանը՝ Վիտալի Բալսանյանն ասաց. «Մեր մեջ երբևէ սև կատու չի անցել, ինչի մասին խոսվում է, որ թշնամություն կա, 20 և ավելի տարիներ մենք հարաբերություններ ունենք: Կարծիք հայտնելը, ի՞նչ է նշանակում, այսինքն՝ եթե Բալասանյանը կարծիք է հայտնել տնտեսական, ռազմական, ղարաբաղյան հարցի, արտաքին հարաբերությունների, պետական սահմանի պաշտպանության մասին, դա ինչու՞ եք թշնամության վերածում: Ես հարգելու եմ ՀՀ սահմանադրությունը, ես վստահ եմ, որ վաղն առավոտյան Նիկոլ Փաշինյանն առաջինն է զանգելու և շնորհավորելու»,-ասաց նա:

Նա ամփոփեց, որ իրենց կառավարությունը լինելու է համահայկական: «Այսօր լինելու է Արցախի լինել-չլինելու հարցը, և վստահ եմ, որ Արցախը լինելու է»,-հավելեց նա: