Մեր հիմնական նպատակն այս իրավիճակում աշխատատեղերը փրկելն է. Միքայել Մելքումյան (տեսանյութ)
Նմանատիպ
ԵՐԵՎԱՆ, 25 ՄԱՐՏԻ, Tert.am: Մենք ոչ պետական հատվածում 436,000 աշխատող մարդ ունենք, դրանցից 200,000-ը օրավարձով են աշխատում: Այս մասին «Բարգավաճ Հայաստան» կուսակցության հատուկ նիստին հատարարեց պատգամավոր Միքայել Մելքումյանը:
Նա նշեց, որ օրավարձով աշխատող մարդն իր հացը չի տանում տուն հիմա, դրան էլ գումարվում է սպառողական վարկը:
«560,000 սպառողական վարկ ունենք, մարդիկ չեն կարողանում ապրել, դրա համար մարդիկ պետք է հստակ իմանան, որ 2-րդ, 3-րդ 4-րդ իրենց գումարները հստակ պետք է ստանան: Մարդկանց պետք է 2-3 ամիս նվազագույն աշխատավարձի չափով, որը 68,000-70,000 դրամ է, գումար տալ: Քանի որ բյուջեով նախատեսված են մեծ կապիտալ ծախսեր, թող Կառավարությունը պետական գնումների կոշտ համակարգը թուլացնի, որ շատ մարդիկ գան այդ տենդերները հաղթեն, և Կառավարությունը ցույց տա աշխատատեղերը, որտեղ այդ մարդիկ պետք է գնան աշխատեն»,- նշեց նա:
Անդրադառնալով փոքր և միջին բիզնեսին Մելքումյանը նշեց, որ 67,000 ՓՄՁ ունենա այսօր: «Եթե համարենք, որ ամեն մի ՓՄՁ-ում աշխատում է նվազագույնը 5000 մարդ, դա նշանակում է 300,000-ից ավելի մարդ այդ ոլորտում է աշխատում: Հիմա այդ մարդիկ հատ-հատ պետք է գնան բանկ և փորձեն պայմանավորվե՞լ վարկի վերաբերյալ: Բայց բանկերում նստած են վերլուծաբաններ և այն բիզնեսը, որը ռիսկային է, նրանց չեն ներելու, ասելու են՝ ավելի լավ է ոչ ռիսկային ոլորտներին ընդառաջենք: Դրա համար պետք է բոլոր ՓՄՁ-ների համար համահարթ մինիմալ ամնիստիա անել, որ բոլորին վերաբերի, ոչ թե ծանոթով հարցեր լուծել»,- նշեց նա:
Բացի այդ, ըստ պատգամավորի՝ պետք է հարկային արձակուրդներ տալ ՓՄՁ-ներին. «Հարկային ներում, ամնիստիա, որպեսզի մի կողմից բնակչությանը փող տալով պահանջարկ ձևավորվի, մյուս կողմից ՓՄՁ-ն աշխատի և բյուջե փող գնա: Այս եռաստիճանը պետք է աշխատի: Մեր հիմնական նպատակը աշխատատեղերը փրկելն է»,-շեշտեց նա:
Հետևեք մեզ նաև Telegram-ում