Չինաստանում կորոնավիրուսի «ներկրված» դեպքերն առաջին անգամ գերազանցել են երկրի ներսում գրանցված դեպքերին
Նմանատիպ
ԵՐԵՎԱՆ, 14 ՄԱՐՏԻ, Tert.am: Չինաստանում կորոնավիրուսի «ներկրված» դեպքերն առաջին անգամ գերազանցել են երկրի ներսում գրանցված դեպքերին, ցույց են տվել Առողջապահության ազգային հանձնաժողովի կողմից հրապարակած տվյալները, հաղորդում է The Guardian-ը:
Ուրբաթ օրը Չինաստանում գրանցվել է վարակի 11 նոր դեպք մեկ օր առաջ գրանցված ութ դեպքերի համեմատ, սակայն հաստատված դեպքերի միայն չորսն են փոխանցվել երկրի ներսում:
Մնացած յոթը, այդ թվում՝ չորսը Շանհայում, մեկը՝ Պեկինում և երկուսը՝ Գանսու հյուսիսարևմտյան նահանգում, հայտնաբերվել են արտերկրից Չինաստան ժամանած ճանապարհորդների մոտ, մասնավորապես՝ Իտալիայից, Միացյալ Նահանգներից և Սաուդյան Արաբիայից: Այս մասին վկայում են տեղական իշխանությունների տվյալները:
Աղբյուրը գրում է, որ Չինաստանը, որտեղ կորոնավիրուսը բռնկվել էր դեկտեմբերին, այժմ, ըստ երևույթին, կանգնած է վարակի տարածման ավելի մեծ սպառնալիքի առաջ, քանի որ երկրի ներսում վիրուսի տարածումը գրեթե զրոյական մակարդակի է հասել, փոխարենը՝ մեծացել է այլ երկրներից Չինաստան ներթափանցելու սպառնալիքը:
Կորոնավիրուսի համաճարակի մասին Չինաստանի իշխանություններն ԱՀԿ-ին հայտնել էին դեկտեմբերի 31-ին: Հայտնի է, որ վիրուսը տարածվել է Հուբեյ նահանգի Ուհան քաղաքից: Չինաստանի սահմաններից դուրս վարակների մեծ մասը հայտնաբերվել է Հարավային Կորեայում, Իրանում և Իտալիայում: Ընդհանուր առմամբ, վարակի դեպքեր են հաստատվել ավելի քան 110 երկրում:
Ամբողջ աշխարհում կորոնավիրուսով վարակվածների ընդհանուր թիվը հասել է 145 931-ի, մահվան դեպքերը 5440 են: Հայաստանում հաստատվել է վարակի 15 դեպք։
Հետևեք մեզ նաև Telegram-ում