Այսօր ՀՀ-ում կորոնավիրուսի դեպք չկա. ԱՆ ներկայացուցիչ

Այսօր ՀՀ-ում կորոնավիրուսի դեպք չկա. ԱՆ ներկայացուցիչ

ԵՐԵՎԱՆ, 24 ՓԵՏՐՎԱՐԻ, Tert.am: Այսօր ՀՀ-ում կորոնավիրուսի դեպք չկա: 2000-ից ավել անձանց հսկել ենք, հոսպիտալացրել ենք 83 անձանց, որոնք ունեցել են թեթև նախանշաններ: Բոլորը թեստավորվել են, արդյունքները եղել են բացասական: Այս մասին լրագրողների հետ հանդիպմանը հայտարարեց Առողջապահության նախարարության հիվանդությունների վերահսկման և կանխարգելման ազգային կենտրոնի գլխավոր տնօրեն Արտավազդ Վանյանը:

Անդրադառնալով ՀՀ-Իրան սահմանի փակմանը, Վանյանն ասաց, որ բեռնափոխադրող վարորդներին հսկելու են խստացված ռեժիմով: «Վարորդները պետք է լինեն լիարժեք հսկողության ներքո: Հստակ մեխանիզմներ կմշակվեն՝ ինչպես պետք է բեռնափոխադրումները կատարել: Գործընթացը կիրականացվի խստացված հսկողության ներքո, և սա ամբողջովին կառավարելի կլինի»,- ասաց նա՝ նշելով նաև, սա չի նշանակում, որ չեն վերահսկելու մյուս երկրներից եկող քաղաքացիներին:

«Բայց հաշվի առնելով Իրանի հետ անմիջական կապը և հոսքերը՝ որոշում կայացվեց փակել Իրանի հետ սահմանը: ժամանակավոր գործընթաց է, որ փորձենք նվազեցնել ռիսկը»,-հավելեց նա:

Դիտարկմանը, թե մտահոգություններ կան, որ Հայաստանում առկա դիմակներն ապահով չեն, և հարցին՝ Հայաստանում կա՞ն այլ տեսակի դիմակներ, և նաև բժիշկների համար նախատեսված համազգեստներ, Վանյանն արձագանքեց, թե դրանք Ն95 դիմակներն են, որոնցից օգտվում են հիմնականում բժիշկները:

«Սա վիրուս է: Առաջինը պետք է պահպանել հիգիենան: Սա ամենակարևոր հարցն է: Ինչպես օդակաթիլային ճանապարհով, այնպես էլ կեղտոտ ձեռքերից վիրուսը կարող է տարածվել: Նույն գրիպի հետ կապված ախտանշաններն են, փոխանցվում են նույն ձևաչափով: Այլ հատուկ պաշտպանիչ միջոց խորհուրդ չի էլ տրվում: Դիմակներ կրելու կարիք չկա: Պետք է կրել այն դեպքերում, երբ շփում կա հիվանդի հետ»,-ասաց նա:

Նա հայտնեց նաև, որ ներկա պահին Հայաստանում կորոնավիրուսի ախտորոշման 600-700 թեստ կա, ևս 1000 թեստ կներկրվի, իսկ թեստավորումը կատարվում է ըստ Առողջապահության համաշխարհային կազմակերպության ստանդարտների:

Ըստ Վանյանի՝ վարակման դեպքում առաջին հիվանդանոցը, ուր կտեղափոխվի քաղաքացին, Նորք ինֆեկցիոն կենտրոնն է, որովհետև այնտեղ կան մեկուսարաններ, մյուս դեպքերում բաշխվածութունը լինելու է ըստ տարածաշրջանի:

Հետևեք մեզ նաև Telegram-ում