ՀՀ իշխանությունները կողմնակից չեն կամ քայլ չեն անում Արցախի անկախության ճանաչման ուղղությամբ. Կիրո Մանոյան

ԵՐԵՎԱՆ, 23 ԴԵԿՏԵՄԲԵՐԻ, Tert.am: Ճիշտ է, որ այս իշխանությունները չունեն Արցախի հարցի կարգավորման ոչ ռազմավարություն, ոչ հայեցակարգ, և տարբեր պահերի տարբեր բաներ են ասում, որոնք ցույց են տալիս, որ չկա այդ հայեցակարգը և ռազմավարությունը: Այս մասին «Ոսկանապատ» վերլուծական կենտրոնի համաժողովին ասաց ՀՅԴ Հայ դատի և քաղաքական հարցերի գրասենյակի ղեկավար Կիրո Մանոյանը:

«Ասվում էր՝ Արցախի մասնակցությունը բանակցություններին կարևորում է Հայաստանը, բայց Բրատիսլավայում ԱԳ նախարարների ժողովից առաջ վարչապետն ԱԺ-ում հայտարարեց, որ հարցի կարգավորման գծով մեր և Արցախի իշխանությունների մոտեցումների մեջ ոչ մի տարբերություն չկա, հարյուր տոկոսով նույնն է: Սա հայտարարել այդպիսի հանդիպումից առաջ, որտեղ ենթադրաբար պիտի բարձրացվեր հարց, որ կարևոր է Արցախի հանրապետության ներկայացուցիչների մասնակցությունը բանակցություններին, անհասկանալի է, որովհետև եթե նույն բանն եք ասելու, ինչո՞ւ պիտի մասնակցեն»,- ասաց նա:

Այն, որ իշխանություններն այս հարցում ռազմավարություն չունեն, վկայում է նաև ԱԳ նախարարի ելույթը Բրատիսլավայում: «Այնտեղ նա ավելի շուտ կարմիր գծեր ցույց տվեց, ոչ թե ռազմավարություն: Այդտեղ կա մի շատ թույլ, խոցելի, նույնիսկ վնասակար մոտեցում. խոսվեց, որ Արցախի ժողովուրդը տակավին պետք է արտահայտի իր կամքը, այսինքն անտեսվում է 1991 թվականի հանրաքվեն, 2006 թվականի Սահմանադրության հանրաքվեն, 2017 թվականի Սահմանադրության հանրաքվեն. ճիշտ այդ տրամաբանությամբ էլ իշխանությունները կողմնակից չեն, քայլ չեն անում Արցախի անկախության ճանաչման ուղղությամբ: Այսօր Արցախի արտաքին քաղաքականության թիվ մեկ ուղղություններից մեկը հենց Արցախի անկախությունը ճանաչելն է, բայց Հայաստանի իշխանությունները համաձայն չեն կամ կողմնակից չեն, որպեսզի Հայաստանն աջակցի միջազգային ճանաչման գործընթացին»,– ասաց նա: