Առկա է նպատակաուղղված արշավ՝ ընդդեմ Արցախի իշխանությունների. Տիգրան Աբրահամյան (տեսանյութ)

ԵՐԵՎԱՆ, 24 ՀՈԿՏԵՄԲԵՐԻ, Tert.am: ԵԱՀԿ Մինսկի խմբի համանախագահների վերջին հայտարարության մեջ չէր արտացոլվել մեզ համար մի քանի կարևոր իրողություն՝ Ադրբեջանի ձեռնարկած դիվերսիոն ներթափանցման փորձն ու անօդաչու թռչող սարքի կիրառումն առաջնագծում, և պաշտոնական Ստեփանակերտը միջնորդների հետ այս մասին է խոսել նրանց տարածաշրջանային այցի ընթացքում:

«Արմնյուզ» ՀԸ «#ՕրաԽնդիր» հաղորդմանը նման կարծիք է հայտնել Արցախի Հանրապետության նախագահի խորհրդական Տիգրան Աբրահամյանը:

Ըստ նրա՝ Իլհամ Ալիևի՝ «Ղարաբաղն Ադրբեջան է» հայտարարությունը հերթական վկայությունն է, որ Ադրբեջանը հասարակությանը նախապատրաստում է պատերազմի, ոչ թե խաղաղության:

Աբրահամյանի պնդմամբ՝ միջնորդների հետ հանդիպմանը պաշտոնական Ստեփանակերտը հավաստել է, որ դեմ է երկու հայ պատանդների հետ ադրբեջանցի դիվերսանտներ Գուլիևի և Ասկերովի փոխանակմանը, քանի որ նրանք հատուկ գործակալներ են և մեղադրվում են սպանության համար:

«Շատ բարդ է պատկերացնել մի հանգուցալուծում, որը կբավարարի երեք կողմերին, ինչպես առաջարկում է վարչապետ Փաշինյանը, հատկապես որ Ադրբեջանը վերջին շրջանում բավական կոշտացրել է իր դիրքորոշումը՝ որևէ տեղ չթողնելով բանակցությունների համար: Ադրբեջանն ամեն կերպ գործընթացը տանում է արգելակման»,- նշել է Արցախի նախագահի խորհրդականը:

Ըստ Տիգրան Աբրահամյանի՝ կարիք չկա, որ Արցախի իշխանությունը դիրքորոշում արտահայտի գեներալ Վիտալի Բալասանյանի հայտարարությունների շուրջ. «Այդ ձևակերպումները որևէ ձևով չպետք է ազդեն ՀՀ-ի և Արցախի հարաբերությունների վրա: Բալասանյանն այսօր որևէ պետական պաշտոն չի զբաղեցնում, ունի իր մոտեցումներն ամենատարբեր հարցերի շուրջ և իր դիրքորոշումն արտահայտելու իրավունք: Չեմ կարծում, թե ՀՀ իշխանությունները դա ընդունում են իբրև պաշտոնական Ստեփանակերտի կարծիք:

Ի վերջո, Բալասանյանը երկար ժամանակ է՝ ակտիվ քաղաքականության մեջ է, եղել է պատգամավոր, ապա՝ նախագահական ընտրություններում Բակո Սահակյանի մրցակիցը»:

Ըստ Աբրահամյանի՝ Արցախի նախագահի առաջիկա ընտրություններում կա ռիսկ, որ թեկնածուների միջև մրցակցությունը կարող է հասարակության ներսում ներքին ջրբաժաններ ստեղծել. «Իշխանության խնդիրն ազատ, արդար, մրցակցային ընտրությունների ապահովումն է: Բակո Սահակյանը կուլիսային որևէ ուղղորդում չի անելու, ամեն ինչ լինելու է հրապարակային»:

Ըստ Տիգրան Աբրահամյանի՝ Հայաստանի մասնակցությունն Արցախի ընտրություններին կլինի բացառապես դիտորդական առաքելությունների և արտերկրի տարբեր գործիչների հրավիրելու տեսքով:

«Անթույլատրելի և վիրավորական է Արցախը հակահեղափոխության օջախ դիտարկելը: Առկա է նպատակաուղղված արշավ՝ ընդդեմ Արցախի իշխանությունների: Կան ուժեր, որոնք շահագրգիռ են ՀՀ-ի և Արցախի իշխանությունների հարաբերությունների սրմամբ և Արցախում ֆորսմաժորային իրավիճակների ստեղծմամբ»,- ամփոփել է Արցախի նախագահի խորհրդականը: