Իրանի նախագահը հայտարարել է, որ Իսրայելն աջակցում է ԻՊ-ին

ԵՐԵՎԱՆ, 25 ՍԵՊՏԵՄԲԵՐԻ, Aysor.am: Իրանի նախագահ Հասան Ռոհանին Իսրայելին «Իսլամական պետություն» (Ռուսաստանում արգելված) ահաբեկչական խմբավորման հանցակից է անվանել: Այս մասին նա ասել է Fox News հեռուստաալիքին տված հարցազրույցում:

«Ահաբեկիչները նրանք են, ովքեր աջակցում են «Իսլամական պետությանը»: Իսրայելն այն երկիրն է, որը հոգ է տանում այդ ահաբեկչական խմբավորման վիրավոր գրոհայինների մասին, Իսրայելը նրանց զենք է մատակարարում»,– ասել է Իրանի նախագահը:

«Իհարկե, անկասկած, իսկ դուք կասկածո՞ւմ էիք»,- ասել է Ռոհանին՝ պատասխանելով հաղորդավարի հստակեցնող հարցին: «Եթե դուք ապացույցներ եք ուզում, դուք պետք է իսրայելական հիվանդանոցներ գնաք և կտեսնեք «Իսլամական պետության» վիրավոր գրոհայիններին: Դուք կտեսնեք, որ զենքը, որն առգրավվել է գրոհայիններից, արտադրվում է Իսրայելում»,- նշել է Իրանի նախագահը: