Թրամփը հայտարարել է Իրանի նախագահ Ռոհանիի հետ հանդիպելու հնարավորության մասին

ԵՐԵՎԱՆ, 10 ՍԵՊՏԵՄԲԵՐԻ, Panorama.am: ԱՄՆ նախագահ Դոնալդ Թրամփը նախօրեին հայտարարել է, որ կարող է հանդիպել Իրանի նախագահ Հասան Ռոհանիի հետ, և որ ինքը որևէ խնդիր չունի նման հանդիպման հետ: Այս մասին գրում է Reuters-ը:

«Դա կարող է պատահել: Դա կարող էր պատահել: Ինձ համար ոչ մի խնդիր չկա», – ասել է Թրամփը Սպիտակ տան լրագրողներին:

Թրամփը ուժեղացրեց պատժամիջոցները Իրանի դեմ այն բանից հետո, երբ ԱՄՆ-ը դուրս եկավ Իրանի և վեց երկրների միջև 2015 թվականի միջուկային պայմանագրից, ասելով, որ համաձայնագիրը Իրանի համար բացել է միջուկային զենք ունենալու ճանապարհ։

Ռոհանին ասել է, որ Իրանը, որը ժխտում է միջուկային զենք ունենալու ծրագիրը, չի խոսի Միացյալ Նահանգների հետ, քանի դեռ Վաշինգտոնը չեղյալ չի հայտարարել այն պատժամիջոցները, որոնք նա վերահաստատեց Թեհրանի նկատմամբ՝ միջուկային գործարքից դուրս գալուց հետո:

Նախորդ շաբաթ Թրամփը հայտնել էր, որ Ռոհանիի հետ հանդիպումը հնարավոր է Նյու Յորքում՝ ԱՄՆ-ի Գլխավոր ասամբլեայի շրջանակներում սեպտեմբերի վերջին: