Վերին Լարսի անցակետում Հայաստան եկող ավտոբուսի ձերբակալված վարորդն ազատ է արձակվել

ԵՐԵՎԱՆ, 27 ՀՈՒՆԻՍԻ, Times.am: Հունիսի 24-ին ռուս-վրացական Վերին Լարսի անցակետի վրացական հատվածում արգելված բեռ տեղափոխելու կասկածանքով ձերբակալված ավտոբուսի վարորդն արդեն ազատ է արձակվել։ Վրաստանում ՀՀ դեսպանության մամուլի ծառայության հաղորդմամբ, սույն գործով ձերբակալվել է ավտոբուսի ուղևորներից մեկը, ում արդեն մեղադրանք է առաջադրվել։

Վրաստանում ՀՀ դեսպանությունը մշտական կապ է պահպանում Վրաստանի պատկան մարմինների հետ և վերոնշյալ գործի առնչությամբ հանդես կգա հավելյալ հայտարարություններով։

Ավելի վաղ «Գրուզիա օնլայն»-ը գրել էր, որ Վրաստանի ոստիկանության ու Ֆինանսների նախարարության պետեկամուտների ծառայության աշխատակիցները «Կազբեգ» անցակետում ձերբակալել են Հայաստանի քաղաքացի 1977 թ. ծնված Ա. Խ.-ին։ Նա կասկածվում է թմրամիջոցի ապօրինի տեղափոխման համար։ Եթե մեղքը ապացուցվի, նրան սպառնում է 6-9 տարվա ազատազրկում։

Աղբյուրը մանրամասնում է, որ հունիսի 25-ին մաքսային ծառայության աշխատակիցները կանգնեցրել են ավտոբուս, որը ուղևորվում էր Հայաստան։ Ավտոբուսի մեջ եղած հովերբորդում հայտնաբերել են մոտ 500 գրամ թմրանյութ, ենթադրվում է հերոին։ Իրականացվում է քննություն։

Վրաստանում ՀՀ դեսպանությունից հայտնել էին, որ հունիսի 24-ի առավոտյան ժամը 06։00-ին, ռուս-վրացական Վերին Լարսի անցակետի վրացական հատվածում արգելված բեռ տեղափոխելու համար կանգնեցվել է հայկական ուղևորափոխադրող ընկերություններից մեկին պատկանող ավտոբուսներից մեկը, ինչի պատճառով Վերին Լարսի անցակետում գտնվող շուրջ 5 տասնյակ ՀՀ քաղաքացիները ժամեր շարունակ մնացել էին անցակետում։