AM | RU
USD
EUR
RUB

Վիտալի Բալասանյան. «Եկել է զգացմունքայինից դեպի գործնական ոլորտ անցում կատարելու պահը»

 

ԵՐԵՎԱՆ, 5 ՀՈՒՆԻՍԻ, Times.am: Օրերս ԼՂՀ Ազգային անվտանգության խորհրդի քարտուղար, Արցախի հերոս Վիտալի Բալասանյանը հանդես է եկել «Հանուն Արցախի» համազգային շարժում ստեղծելու նախաձեռնությամբ։ Հանրությանն ուղղված իր խոսքում նա անհանգստությամբ արձանագրել է, որ ոչ բոլոր հասարակական-քաղաքական ուժերը, հեղինակություն վայելող անհատներն են գիտակցում հայկական պետականության շուրջ ստեղծված իրավիճակի լրջությունն ու դրանից բխող վտանգավոր հետևանքները: Բալասանյանը նաև համոզմունք է հայտնել, որ օրվա հրամայականն է ուղիներ որոնել մեր ազգի հնարավորությունները լիարժեք և նպատակային օգտագործելու համար:

«Հանուն Արցախի» համազգային շարժման և հայ հանրության առջև ծառացած մարտահրավերների մասին առավել մանրամասն մեկնաբանություններ ստանալու ակնկալիքով Times.am-ի թղթակիցը զրուցել է Արցախի ԱԱԽ քարտուղար Վիտալի Բալասանյանի հետ։ Ձեզ ենք ներկայացնում Արցախի հերոսի հարցազրույցը մեր լրատվականին։

- Պարոն Բալասանյան, վերջերս Դուք հայտարարեցիք «Հանուն Արցախի» համազգային շարժում սկսելու նախաձեռնության մասին։ Ինչու՞ հենց հիմա։ Մտահոգություն չունե՞ք, որ այդ միտքը կարող է ընկալվել որպես նախընտրական այս բուռն շրջանում Ձեր վարկանիշի բարձրացմանը միտված «ձիով քայլ»։ Չէ՞ որ Արցախում հիմա իսկական ներքաղաքական իրարանցում է։

- Այդ ամենի շուրջ ես իհարկե մտորել եմ, համոզված լինելով, որ կլինեն մարդիկ, ովքեր ելնելով ստեղծված իրավիճակից, առաջին հերթին կհանգեն նման եզրակացության: Նախ քաղաքական իրարանցման մասին: Ես այն կարծիքն ունեմ, որ այն արհեստական է ու շինծու։ Դրա տակ այլ ծրագրեր են թաքնված, որոնք չեն բխում ժողովրդի և հայկական պետականության շահերից: Անչափ վտանգավոր եմ համարում, երբ փորձ է արվում իրավիճակի սրացման միջոցով ջլատել հայության ուժերը և կասկածի տակ դնել նրա վճռականությունն ու համոզմունքները: Շարժումն առաջին հերթին նպատակ ունի չեզոքացնել այն մտայնությունները, որ տեղ են գտել Հայաստանի և Արցախի հանրության շրջանում, նրա ողջ էներգիան ուղղել կառուցողական հուն, նպաստել անկեղծության, անաչառության և թափանցիկության մթնոլորտի ապահովմանը, հանրությանը մասնակից դարձնել կարևոր ծրագրերի իրականացման գործընթացին՝ բացառելով չարաշահումներն ու հովանավորչությունը: Արցախի, Հայաստանի և Սփյուռքի առաջ հսկայական թվով տարատեսակ խնդիրներ են ծառացել, որոնց մասին միշտ չէ որ անկեղծորեն բարձրաձայնում և լուծման արդյունավետ ուղիներ ենք որոնում։ Մինչդեռ ժամանակը չի սպասում, իսկ մենք շարունակում ենք դոփել տեղում: Արցախյան շարժումից հետո բազում տարիներ են անցել, սակայն մեզ այդպես էլ չի հաջողվել ստեղծել գյուղական համայնքների զարգացման ճանապարհային քարտեզ, ինչը կասկածի տակ է դրել երբեմնի մարդաշատ ու աշխույժ մի շարք համայնքների գոյությունը նախկին տեսքով: Մենք մտադիր ենք այս վտանգավոր զարգացումը բացառելուն ուղղված գործնական ծրագրեր իրականացնել: Ամեն բացթողում և թերություն չէ, որ կարելի է բարդել այլոց և պետության վրա՝ մոռանալով մեղքի մեր բաժինը: Շարժումը նպատակ ունի վեր հանել և ողջ հայության ուշադրությունը բևեռել նմանատիպ կարևոր խնդիրների վրա:

Իսկ ինչ վերաբերվում է ընտրությունների հետ կապված իմ վարկանիշի՝ նման ձևով բարձրացմանն ուղղված քայլերին, խոստովանեմ, որ բարեբախտաբար ես նման խնդիր չունեմ:

- Շարժման մեկնարկի մասին Ձեր հայտարարության մեջ առաջ է քաշվում Արցախի Հանրապետության միջազգային ճանաչման հարցը և դա այն իրավիճակում, երբ միացման գործընթաց սկսելու նպատակով դաշինքներ են ձևավորվում, ավտոերթեր են կազմակերպվում: Հնարավոր է լինեն նաև այլ կարգի ակցիաներ:

- Շատ հնարավոր է, սակայն դրանք այս պահին հաջողությամբ չեն պսակվի։ Եթե նկատել եք, այդ բոլոր կոչերը հանրության շրջանում այն արձագանքը չգտան, որն ակնկալում էին դրանց հնչեցնողները: Սակայն դա ամենևին էլ չի նշանակում, որ հանրությունը մտափոխվել է և նրան այլևս չի մտահոգում միացման գաղափարը: Ամենևին: Այդ գաղափարը Հայաստանի առաջին հանրապետության հռչակումից մինչ օրս թե՛ Արցախում, թե՛ Հայաստանում և թե՛ Սփյուռքում չի կորցրել իր արդիականությունը, հրատապությունն ու կենսունակությունը: Չեմ կարծում, որ բոլոր նրանք, ովքեր փորձել են օրակարգ բերել այս խնդիրը, չգիտեն այս պահի դրությամբ դրա իրականացման ճանապարհին գոյություն ունեցող արգելապատնեշների ու հնարավոր հետևանքների մասին: Ի վերջո, եկեք իրերին սթափ հայացքով նայենք և հիշենք, որ մենք ոչ թե գերտերություն, այլ ընդամենը փոքր և խոցելի տնտեսություն ունեցող երկիր ենք, որն ի զորու չէ անտեսել միջազգային օրենքները: Իսկ եթե այնուամենայնիվ հայ հանրության շրջանում կա նման պահանջարկ, գտնում է, որ միացումն անհետաձգելի քայլ է և հանդիսանում է մեր ժողովրդի առաջ ծառացած թիվ մեկ խնդիրը, ուրեմն ոչ թե փողոցում պետք է ձեռնամուխ լինել դրա իրականացմանը, այլ պետական ամենաբարձր մակարդակով ուսումնասիրել դեպի լիակատար միացում տանող հնարավոր բոլոր տարբերակները, կատարել այնպիսի ընտրություն, որը կասկածի տակ չի դնի Արցախի անվտանգությունը: Ես ավելի քան համոզված եմ, որ այս առումով Արցախում երբեք խնդիրներ չեն ծագի:

Շարժումը ելնում է ժամանակի հրամայականից։ Առաջնահերթություն համարելով Արցախի Հանրապետության միջազգային ճանաչման հարցը՝ մենք գտնում ենք, որ դառնալով միջազգային սուբյեկտ, կխուսափենք նաև միացումն իրականացնելու գործընթացի հնարավոր բոլոր հիվանդագին խնդիրներից:

- Դուք առաջ եք քաշում նաև հայկական երկու պետությունների անվտանգության ամրապնդման հարցը: Խոսելով այդ խնդրի մասին՝ մեր զինվորական բարձրաստիճան այրերը հավատացնում են, որ հայկական միացյալ ուժերը ցանկացած պահի պատրաստ են ոչ միայն չեզոքացնել հակառակորդի ոտնձգությունները, այլև ռազմական գործողությունները տեղափոխել նրա տարածք: Այդ դեպքում ինչի՞ մասին է խոսքը:

- Մեզանում թյուրըմբռնում գոյություն ունի անվտանգության ամրապնդում, ապահովում հասկացությունների հանդեպ: Խոսքը միայն սահմանների անձեռնմխելիության ապահովման մասին չէ։ Անվտանգությունը շատ ավելի ընդգրկուն և լայն հասկացություն է՝ բաղկացած է մի շարք շաղկապված շերտերից՝ տնտեսության զարգացում, պարենային ինքնաբավություն, բնակչության նորմալ կենսագործունեություն, ներքին կյանքի ներդաշնակություն, բարոյահոգեբանական վիճակ, քաղաքական ցնցումների բացառում և այլն: Ի վերջո, եթե երկրի քաղաքացին լիարժեք կյանքով չի ապրում, դա նույնպես վնասում է երկրի անվտանգությանը: Այնպես որ այս բոլոր ուղղություններում մենք հսկայական անելիքներ ունենք:

- Դատելով Ձեր հայտարարության մեջ տեղ գտած Սփյուռքին առնչվող ձևակերպումից, «Հանուն Արցախի» համազգային շարժմանը չեն բավարարում մինչ հիմա գոյություն ունեցող հարաբերությունների մակարդակը: Ճի՞շտ եմ կռահել:

- Միանշանակ: Շուրջ երեք տասնամյակ է, ինչ Սփյուռքի հայությունը նյութական և բարոյական անշահախնդիր օգնություն է ցուցաբերում Արցախին: Հենց այդ օգնության շնորհիվ էլ մեզ հաջողվեց լուրջ քայլեր ձեռնարկել մեր ավերված տնտեսությունն ու ենթակառույցները վերականգնելու ուղղությամբ: Ճշմարտության առաջ չմեղանչելու համար միաժամանակ ասեմ, որ մեզ այդպես էլ չհաջողվեց Արցախը դարձնել գրավիչ, ինչն ի սկզբանե մտադիր էինք իրականացնել: Պարզապես միշտ չէ որ Սփյուռքի, ինչու՞ չէ՝ նաև Հայաստանի կողմից մեզ տրամադրված ռեսուրսներն օգտագործել ենք նպատակային ու հասցեագրված, որի հետ այսօր էլ ես չեմ հաշտվում և առողջ տրամաբանության մեջ չտեղավորվող աններելի երևույթ եմ համարում:

Ես շատ հեռու եմ այն մտքից, որ Արցախում ամեն ինչ իդեալական է: Այդպիսին չեն նաև մեր հարաբերությունները Հայաստանի և Սփյուռքի հետ, ինչը արմատական վերանայման անհրաժեշտություն ունի: Եկել է զգացմունքայինից դեպի գործնական ոլորտ անցում կատարելու և Սփյուռքի շահն ու շահագրգռվածությունը հաշվի առնելու պահը: Ես անընդունելի եմ համարում այն տեսակետը, որ Սփյուռքի գլխավոր դերակատարումը պետք է շրջանակվի հայրենիքին ցուցաբերվող օգնության և աջակցության տեսքով: Այն պարտադիր կարգով պետք է լինի փոխադարձ և փոխշահավետ: Միայն նման մոտեցման պարագայում մենք կարող ենք ստեղծել Միացյալ, զարգացած և հզոր Հայաստան: Ահա շարժման գլխավոր նպատակը: Ասել է թե՝ այդ հարաբերություններին մտադիր ենք հետայսու հաղորդել գործնական, փոխշահավետ հենք, հաշվի առնելով Սփյուռքի մեր հայրենակիցների ցանկություններն ու մտահղացումները:

- Պարոն Բալասանյան, համազգային Շարժում ձևավորելու մասին Ձեր հայտարարությունը ի՞նչ արձագանք գտավ մեր հայրենակիցների շրջանում։ Չունե՞ք մտավախություն, որ ինչ-ինչ ուժեր կփորձեն նսեմացնել նաև այս գաղափարը:

- Եթե անկեղծ, արձագանքներն ինձ հաճելիորեն զարմացրել են։ Հարյուրավոր մարդիկ, հասարակական-քաղաքական գործիչներ շտապեցին իրենց աջակցությունը հայտնել իմ մոտեցումներին։ Տարբեր կազմակերպություններ բարձրաձայնեցին Շարժմանը միանալու իրենց որոշման մասին։ Եվ սա իսկապես շատ ոգևորող է։ Աշխատանքի մեծ դաշտ է բացվել և կարևոր է, որպեսզի այդ նպատակների իրականացմանը միտված մեր ուղին սկսենք ճիշտ քայլերից։

Ինչ վերաբերվում է քննադատություններին, ապա՝ այո, որոշ մարդիկ արդեն հասցրել են կասկածի տակ դնել ոչ միայն մեր նախաձեռնությունը, այլև գաղափարը։ Բայց այդ ամենը շատ մակերեսային է։ Նրանք անգամ չեն հիմնավորել, թե կոնկրետ ինչին են դեմ՝ «Հանուն Արցախի» գաղափարի՞ն, թե պարզապես նրան, որ այդ նախաձեռնությունը հեղինակել եմ ես:

Ծանոթանալով բացասական մի քանի արձագանքների՝ մտաբերեցի մի շատ հին արտահայտություն՝ չգիտեմ, թե դուք ինչ եք ուզում ասել, բայց ես դեմ եմ: Բոլոր դեպքերում բացասական արձագանքն էլ արձագանք է, այնպես որ անգամ դրանցում է կարելի դրական միտումներ գտնել։ Որովհետև դրանք իրենց մեջ նաև զգաստության կոչի տարրեր են պարունակում և զգուշացնում ու պարտավորեցնում, որ մեր մտահղացումների իրականացման ճանապարհին գաղափարից չշեղվենք, լինենք իրատես ու հետևողական: Իսկ մենք այդպիսին էլ կլինենք:

Լրահոս
ՀՀ տարածքում կան փակ և դժվարանցանելի ավտոճանապարհներ. Լարսի ռուսական կողմում կա կուտակված մոտ 1000 բեռնատար ՕՐՎԱ ԽՈՐՀՈՒՐԴԸ: Փետրվարի 17 Արցախը պատրաստ է Ղարաբաղյան հակամարտության խնդրի լուծման ցանկացած սցենարի Գործի է դրված «տարածքներ խաղաղության դիմաց» մոդելը Թուրքիան ահաբեկչական խմբավորման գրոհայիններին Սիրիայում զինում է ռազմատեխնիկայով և սեփական բանակի համազգեստով Տավուշի ուղղությամբ այսօր ՀՀ զինծառայող է վիրավորվել․ Նիկոլ Փաշինյան Արցախը չունի ներկայացուցիչներ, Արցախն ունի օրինական ընտրված իշխանություն. Արթուր Ղազինյան Զինված հանցագործները կրակ են բացել Բեռլինի կենտրոնում, մեկ մարդ մահացել է Նիկոլ Փաշինյանի ու Իլհամ Ալիևի հանդիպումը Մյունխենում. ՏԵՍԱՆՅՈՒԹ 2020 թվականի հունվարը մարդկության պատմության մեջ ամենատաքն է եղել Թուրքիան կրկին լրացուցիչ զորքեր է ուղարկել Իդլիբ Փորձագետներն ասել են Մունկի «Ճիչը» կտավի գույնի փոխվելու պատճառը Կարևորվել է Երևանի և Պրահայի միջև ուղիղ չվերթների հաստատումը Սեյրան Օհանյանը՝ բանակում մահվան դեպքերի մասին Թայվանում 5,4 և 4,7 մագնիտուդ ուժգնությամբ երկու երկրաշարժ է տեղի ունեցել Մելիք-Շահնազարյան. Մեր ԱԳՆ-ի գործուն մասնակցությամբ բանակցություններում նվազեցվում է Արցախի իշխանության կարգավիճակը Ստացվում է՝ սև խավիարի պատմությունը սուտ չէ․ Նարեկ Սամսոնյան (տեսանյութ) Նարեկ Սամսոնյանը մեղադրյալի դատաիրավական կարգավիճակ չի կարող ունենալ, դատաիրավական կարգը հաղթահարված չէ. պաշտպան (տեսանյութ) Եթե ամեն իշխանություն իրեն տհաճ մարդկանց նկատմամբ սկսի հետապնդումներ, մենք չենք կարող ապահովել մինիմալ իրավական վիճակ. Analitik.am-ի գլխավոր խմբագիր ՊԲ շտաբում տեղի է ունեցել ծառայողական խորհրդակցություն, քննարկվել են Արցախի ԶՈՒ-երում մահվան ելքով դեպքերին վերաբերող հարցեր Հայ դիրքապահների ուղղությամբ հակառակորդն այս շաբաթ արձակել է շուրջ 1100 կրակոց. ՊԲ Սա գործընթաց է թե՛ մամուլում, թե՛ քաղաքական դաշտում քննադատությունը լռեցնելու համար. Արսեն Բաբայան (Տեսանյութ) Արցախի նախագահական ընտրություններին մասնակցելու հայտ է ներկայացրել 12 թեկնածու Նարեկ Սամսոնյանի նկատմամբ հետապնդումներն ուղղակի հետպնդումներ են «Antifake.am»-ի նկատմամբ՝ որպես ազատ մամուլի. Աստղիկ Մաթևոսյան (ՏԵսանյութ) Նիկոլ Փաշինյանը նպատակ ունի ինձ մեկուսացնել հանրաքվեի քարոզարշավի ընթացքում. Նարեկ Սամսոնյան (տեսանյութ) Օդի ջերմաստիճանը կբարձրանա Իրավաբանությունը Հայաստանի Հանրապետությունում դարձել է հիբրիդային գիտություն. Արսեն Բաբայան Կորոնավիրուսը հասել է Եգիպտոս «Քաղաքացիական գիտակցություն» ՀԿ նախագահ Նարեկ Սամսոնյանը «սև խավիարի գործով» որպես մեղադրյալ կանչվել է ՀՔԾ․ ուղիղ 23-ամյա զինծառայողի մահվան դեպքի առթիվ հարուցվել է քրեական գործ Իրավապաշտպան Արսեն Բաբայանը մանրամասներ ներկայացրեց իրեն վերաբերող քրեական գործի մասին (տեսանյութ) Անթույլատրելի գործընթացներ են ընթանում. Տ.Աբրահամյան Ստամբուլում 7-հարկանի շենք է փլուզվել (լուսանկարներ) Արցախում 23-ամյա զինծառայող է զոհվել (թարմացված) Լարսը բաց է Երևանում և 8 մարզում սպասվում են էլեկտրաէներգիայի անջատումներ «Հրապարակ». ԲՀԿ-ն որոշեց չմասնակցել հանրաքվեին. մանրամասներ քաղխորհրդի նիստից «168 ժամ». 5 մանիպուլյացիա ԱԺ ամբիոնից՝ Սահմանադրական դատարանի մասին «Ժողովուրդ»․ Վեթինգի գաղափարը վերակենդանանում է «Հրապարակ». Հարթակ ենք ստեղծում «այո»-ն բացառող կարծիքների համար. Ռուբեն Մելիքյանը՝ «ոչ»-ի շտաբի մասին
Խմբագրի ընտրություն
website by Sargssyan