Մեղրիի գնդում տեղի ունեցած դեպքով մեղադրանք է առաջադրվել մի քանի զինծառայողի

ԵՐԵՎԱՆ, 16 ԱՊՐԻԼԻ, Aysor.am: Մեղրիի զորամասում զինծառայողների անհնազանդության, զորամասը լքելու և դրան հետևած իրադարձությունների առիթով հարուցված քրեական գործով դատախազի ցուցումով մեղադրանք է առաջադրվել մի քանի զինծառայողի, Aysor.am-ին հայտեցին ՀՀ գլխավոր դատախազությունից:

«Զինծառայողներին մեղադրանք է առաջադրվել ՀՀ քրեական օրենսգրքի 364-րդ հոդվածի 2-րդ մասով, այն է՝ զինծառայության առանձին պարտականություններ կատարելուց հրաժարվելը»,- նշեցին դատախազությունից։

Նշենք, որ ՀՀ ՔՕ 364-րդ հոդվածի 2-րդ մասը սահմանում է պատիժ՝ կարգապահական գումարտակում պահելով` մեկից երեք տարի ժամկետով, կամ ազատազրկում` մեկից հինգ տարի ժամկետով:

Հիշեցնենք` Մեղրիում տեղակայված զորամասերից մեկի զինծառայողներն ինքնակամ լքել էին զորամասը՝ բողոքելով իրենց ծառայակիցներից մեկին այլ զորամաս տեղափոխելու որոշման դեմ։ Գնդի սպաների խոսքով՝ մասսայական այս ակցիան կազմակերպելու մեջ կասկածվող զինծառայողները պարբերաբար աչքի են ընկել ոչ կանոնադրային պահվածքով։

Զորամասում գրանցված միջադեպով երկու քրեական գործ է հարուցվել։

Անի ՎԱՐԴԱՆՅԱՆ