Ռոբերտ Քոչարյանի կենսաթոշակային հաշվեհամարի վրա դրված կալանքը վերացվել է

Ռոբերտ Քոչարյանի կենսաթոշակային հաշվեհամարի վրա դրված կալանքը վերացվել է

ԵՐԵՎԱՆ, 3 ԱՊՐԻԼԻ, Times.am: Մարդու իրավունքների պաշտպան Արման Թաթոյանը ՄԻՊ գրասենյակի գործունեության մասին Ազգային ժողով ներկայացրած 2018 թվականի տարեկան հաղորդման մեջ առանձին հատվածով անդրադարձել է Մարտի 1-ի քրեական գործին, այդ գորով անցնող մեղադրյալներին, մասնավորապես ազատազրկման մեջ գտնվող ՀՀ 2-րդ նախագահ Ռոբերտ Քոչարյանի պահման պայմաններին։

Մասնավորապես, ըստ ՄԻՊ տարեկան հաղորդման, ՀՀ գլխավոր դատախազությանն և Հատուկ քննչական ծառայությանը արված հարցումներին ստացված պատասախնների համաձայն՝ Մարտի 1-ի քրեական գործով նախաքննության ընթացքում քննչական խմբի կողմից գործով օբյեկտիվ ճշմարտությունը բացահայտելու, մեղավոր անձանց շրջանակը պարզելու և նրանց գործողություններին իրավական գնահատական տալու նպատակով հարցաքննվել են վկաներ, հետաքննության մարմիններին տրվել են օպերատիվ-հետախուզական միջոցառումներ իրականացնելու վերաբերյալ հանձնարարություններ, կատարվել են խուզարկություններ, առգրավումներ, նշանակվել են փորձաքննություններ։

Մասնավորապես, ըստ աղբյուրի, որպես վկա հարցաքննվել են 1000-ից ավելի անձինք, քաղաքացիներից և պետական տարբեր հիմնարկներից կատարվել են թվով 85 առգրավումներ,կատարվել են 40-ից ավելի խուզարկություններ, նշանակվել է թվով 23 փորձաքննություն, փորձաքննության է ներկայացվել ավելի քան 146 միավոր հրազեն և մեծ քանակությամբ զինամթերք:

Հիշեցնենք՝ այս քրեական գործի շրջանակներում մեղադրյալներ են ՀՀ նախկին նախագահ ռոբերտ Քոչարյանը, ՀԱՊԿ նախկին գլխավոր քարտուղար Յուրի Խաչատուրովը, պշատպանության նախկին նախարարներ Սեյրան Օհանյանը և Միքայել Հարությունյանը (հետախուզման մեջ է), ՀՀ նախագահի աշխատակազմի նախկին ղեկավար Արմեն Գևորգյանը։

Պաշտպանն իր հաղորդման մեջ անդրադարձել է «Երևան-Կենտրոն» քրեակատարողական հիմնարկում ՀՀ 2-րդ նախագահ Ռոբերտ Քոչարյանի պահման պայմաններին։ «Ինչպես առաջին, այնպես էլ երկրորդ անգամ կալանքի տակ գտնվելու ընթացքում Ռոբերտ Քոչարյանի կողմից չեն ներկայացվել դժգոհություններ քրեակատարողական հիմնարկի ծառայողների վերաբերմունքից», -նշել է ՄԻՊ-ը իր տարեկան հաշվետվության մեջ։

Տեղեկանում ենք, որ Պաշտպանի հետ առանձնազրույցի ընթացքում Հանրապետության երկրորդ նախագահի կողմից բարձրացվել են մի շարք հարցեր, որոնք ուղղվել են համապատասխան պետական մարմինների: Մասնավորապես, այդ հարցերի թվում քննարկման առարկա են դարձվել՝ քրեակատարողական հիմնարկի խցում համակարգիչ կամ էլէկտրոնային համարժեք միջոց ունենալու, ողջ գույքի, այդ թվում՝ կենսաթոշակի հաշվեհամարի վրա կիրառված արգելանքի իրավաչափության, ինչպես նաև. մերձավոր ազգականների, այդ թվում՝ ընտանիքի անդամների հետ սահմանված տեսակցությունների և հեռախոսային խոսակցությունների արգելքի հարցը:

Նշվում է, որ պաշտպանի միջամտությամբ Ռոբերտ Քոչարյանին տրամադրվել է խցում առանց ինտերնետ համացանցի հասանելիության համակարգիչ կամ համարժեք էլէկտրոնային միջոց ունենալու թույլտվություն: Անդրադառնալով ընտանիքի հետ տեսակցությունների արգելքին, ՄԻՊ հաշվետվության մեջ նշվում է, որ Հատուկ քննչական ծառայությունից տեղեկություններ են ստացվել այն մասին, որ մերձավոր ազգականների նկատմամբ կիրառված տեսակցությունների և հեռախոսային խոսակցությունների արգելքը վարույթն իրականացնող մարմնի կողմից մասնակի վերացվել է: Արգելքը պահպանվել է միայն մերձավոր ազգականներից մեկի նկատմամբ, ով քրեական գործով վկայի դատավարական կարգավիճակ ունի:

Բացի այդ, ՀՔԾ-ից նար տեղեկացրել են, որ վերացվել է Ռոբերտ Քոչարյանի կենսաթոշակային հաշվեհամարի վրա դրված կալանքը:

«Ձեռնպահ մնալով քրեական վարույթի ընթացիկ գործով որևէ գնահատական տալուց՝ Մարդու իրավունքների պաշտպանն, այնուամենայնիվ, անհրաժեշտ է համարում ընդգծել, որ հանրային բարձր հետաքրքրություն ունեցող քրեական գործեր քննելիս պետությունը ստանձնում է առավել պատասխանատվություն հետևողականորեն երաշխավորելու քրեորեն հետապնդելի արարքում մեղադրվող ցանկացած անձի անմեղության կանխավարկածը: Դա միայն ցույց է տալիս՝ որքան բարձր է պետությունը գնահատում հանցավորության դեմ պայքարի իր հանձնառությունը՝ այդ պայքարի արդյունքների կայուն հավաստիությունը ապահովելու տեսանկյունից: Ավելին, քրեական արդարադատության համակարգը կրում է քրեական վարույթին առնչվող անհրաժեշտ տեղեկություններ հանրությանը տրամադրելու և այդ կերպ հաշվետու քննություն ապահովելու պարտադիր բեռը: Սա իր հերթին կոչված է երաշխավորելու հանրության վստահությունն առ այն, որ քրեական կոնկրետ վարույթն իրականացվում է իրավունքի գերակայության մշտական պահպանմամբ», – նշվում է Պաշտպանի տարեկան հաղորդման մեջ։

Ռոբերտ Քոչարյանի կենսաթոշակային հաշվեհամարի վրա դրված կալանքը վերացվել է

Հետևեք մեզ նաև Telegram-ում