Սոցիալական տարբեր խմբերի շուրջ 100 երեխա այցելել է Էրեբունի արգելոց-թանգարան

Սոցիալական տարբեր խմբերի շուրջ 100 երեխա այցելել է Էրեբունի արգելոց-թանգարան

Երևանի քաղաքապետարանի աշխատակազմի ընտանիքի, կանանց և երեխաների իրավունքների պաշտպանության բաժնի կողմից մշտական ուշադրության կենտրոնում են մայրաքաղաքում բնակվող սոցիալական տարբեր խմբերի ընտանիքներն ու նրանց երեխաները, որոնց համար տարվա ընթացքում պարբերաբար կազմակերպվում են տարբեր ծրագրեր: Այս մասին «Արմենպրես»-ին տեղեկացրին Երևանի քաղաքապետարանի տեղեկատվության և հասարակայնության հետ կապերի վարչությունից:

«Էրեբունի-Երևան 2798» միջոցառումների շրջանակում Աջափնյակ վարչական շրջանի երեխաների սոցիալական հոգածության կենտրոնի և Հանրապետական հ. 1 հատուկ կրթահամալիրի սաներն այցելել են Էրեբունի պատմահնագիտական արգելոց-թանգարան, շրջել ցուցասրահներով և ծանոթացել շուրջ 3-հազարամյա մայրաքաղաքի պատմությանը: Ծրագրում ընդգրկվել է ավելի քան 100 երեխա:

«Սոցիալական և ոչ մի խումբ, հատկապես երեխաները, անմասն չեն մնում քաղաքային մշակութային ծրագրերից։ Այդ նպատակով մենք պարբերաբար հանդես ենք գալիս նախաձեռնություններով, որոնք կհետաքրքրեն և միաժամանակ ուսուցողական ու դաստիարակչական կլինեն երեխաների համար»,-նշել է ընտանիքի, կանանց և երեխաների իրավունքների պաշտպանության բաժնի պետ Իդա Խաչատրյանը:

Հետևեք մեզ նաև Telegram-ում