Ընդդիմության միասնական առաջարկից իշխանությունները շահելու են

Ընդդիմության միասնական առաջարկից իշխանությունները շահելու են

Ընտրական նոր օրենսգրքի շուրջ ընդդիմության միասնական առաջարկն իշխանությանը վատ դրության մեջ չի դնի, ավելին՝ ձեռնտու է: Այս մասին Times.am-ի հետ զրույցում ակնարկեց ԱԺ ՀՀԿ խմբակցության անդամ Սամվել Նիկոյանը:

-Ընտրական նոր օրենսգիրք ունենալը բխում է Նոր սահմանադրությունից, երկրորդ՝ իշխանությունն իր առջև խնդիր է դրել՝ կազմակերպել ընտրություններ, որոնք վստահելի  կլինեն  քաղաքացիական հանրության և  միջազգային կազմակերպությունների համար: Մենք ուզում ենք գնալ այդ ճանապարհով:  Եթե ընդդիմությունը մի տեսակետ է արտահայտի, մեզ համար շատ հեշտ  և հասկանալի կլինի՝ ո՞ր ճանապարհով գնանք, որպեսզի վստահելի լինի իրենց համար: Պատկերացրեք, եթե մեկն ասում է՝  էսպես չեղավ, ուրեմն չեմ հավատա, մեկն էլ թե՝ եթե էսպես եղավ, ես կհավատամ, պատկերացրեք, թե  ինչ կլինի: Դրա համար եմ ասում՝ ցանկալի կլինի նրանց միասնական մոտեցումը:

-Ընդդիմությանը կասկածների տեղիք տվեց, որ Ընտրական նոր օրենսգրքի նախագիծը նախ ուղարկվեց Վենետիկի հանձնաժողով, որից հետո միայն հանձնվելու է խորհրդարանի դատին: 

Կառավարության հետ աշխատել են փորձագետներ, Վենետիկի հանձնաժողովը դա  փորձագետներ են, որից  հետո  նախագիծը մտնում է քաղաքական քննարկումների փուլ: Ունենալու ենք բոլոր հնարավորություններն այն հանձնաժողովներում քննարկելու, լիագումար նիստում առաջին ընթերցում, հետո  նորից հանձնաժողով, երկրորդ ընթերցում, լսումներ… Այսինքն՝ կա փաստաթուղթ, խնդրեմ ձեր առաջարկները. քննարկեք, ձեր տեսակետները դարձրեք միասնական և առաջարկեք, թե ինչպես անենք, որ դուք վստահեք, որ լինի և տեխնիկապես իրականանալի, և օրենքի շրջանակում: Կա առաջարկ ընտրողների գրանցման գործընթացը դարձնել էլեկտրոնային, կա մտահոգություն՝ ինչպես անել, որ վստահեն գրանցմանը, որովհետև եթե գրանցման փուլը լինում է օրինական, հարցերի 90 տոկոսը դուրս է գալիս: Ունե՞ք տեսակետներ դրա հետ կապված, եկեք առաջարկեք: Ցանկություն ունե՞ք, որ հետագա փուլերը ևս էլեկտրոնային լինեն, առաջարկեք ձեր տեսակետները:

Դուք մի առիթով վստահեցրեցիք, որ 2017-ին քաղաքական խորհրդարան ենք ունենալու, դա ենթադրո՞ւմ է ՀՀԿ խմբակցության «բովանդակության» փոփոխություն, կարելի՞ է ակնկալել, որ խորհրդարանական կառավարման համակարգի օրենսդիր մարմնում  չեն լինի պառլամենտական գործունեությունից  հեռու մարդիկ:

Ըստ իս՝ յուրաքանչյուր պառլամենտ իր նախորդի համեմատ շատ ավելի առաջադիմական է, քան նախորդը: Իհարկե  փոխվում  է, իհարկե  սերունդ է փոխվում, մարդիկ: Վերջիվերջո այն պատգամավորները, որոնք հասարակության ու լրագրողների քննադատության թիրախում են, իրենցից շատերն էլ, հավանաբար, չեն ցանկանա նորից հայտնվել խորհրդարանում, վստահ եմ: Բայց պառլամենտական ակտիվությունը չպետք է կապել լավի, վատի, դրականի կամ բացասականի հետ: Յուրաքանչյուր քաղաքական ուժ ինքն է որոշում իր ստրատեգիան՝ ինչ փուլում ինչ ակտիվություն դրսևորել, նունպես էլ անհատը, իսկ ակտիվությունը կախված է նրանից, թե ինքն ընդդիմադիր է, թե՞ իշխանական թևից: Ես իմ տեսակետը չպետք է արտահայտեմ լիագումար նիստին,  որովհետև բազմաթիվ փուլեր ու հարթություններ կան, որտեղ ես նախագծի նախնական ձևավորման փուլում  կարող եմ իմ տեսակետն արտահայտել և ներառել այնտեղ: Լիագումար նիստը դա ընդդիմության և իշխանության բանավեճի տեղն է, ոչ թե իշխանությունն իշխանության հետ պիտի բանավիճի:  Լիագումար նիստը քաղաքական բանավեճի վայր է՝ իշխանություն-ընդդիմություն: Բոլորն ասում են՝ եկեք ձեր կառավարությանը քննադատեք, մենք մեր կառավարության հետ խոսելու բազմաթիվ տեղեր ունենք:

-Ուզում եք ասել, որ ՀՀԿ խմբակցությունում բազմակարծություն կա՞:

-Իհարկե, իհարկե կա, ինչի մասին է խոսքը: Նույն էլեկտրոնային քվեարկության հետ կապված ես ունեմ իմ կարծիքը՝ ընտրողների գրանցումը, քվեարկությունը, հաշվառումը պիտի արվի փուլային, առհասարակ, էլեկտրոնային համակարգի ներդրումը պիտի փուլային լինի: Սակայն եթե հստակ որոշում կայացվի, ես կպաշտպանեմ իմ ֆրակցիոն կարգապահությունը, բայց դրանից առաջ փորձում եմ որոշումների վրա ազդել:

-Կառավարման օղակում կառուցվածքային վերջին փոփոխություններն որքանո՞վ են արդարացված, տրամաբանական, նպատակային: Ոչ հեռու անցյալում, երբ տարածքային կառավարման և արտակարգ իրավիճակների նախարարությունները,  ՊԵԿ-ը և ֆինանսների նախարարությունը միաձուլվեցին, համոզում էին, որ շահելու ենք և ծախսերի կրճատման, և դրանց գործունեության արդյունավետությունը բարձրացնելու առումով, հիմա նորից վերադառնում ենք այսպես ասած՝ ոչ արդյունավետ վիճակին: Սա չի՞ արվում ընդամենը որոշ մարդկանց անպաշտոն չթողնելու համար:

-Յուրաքանչյուր ժամանակահատվածում տարբեր գործոնների  հանրագումարում կարող է ընտրվել այս կամ այն ձևը: Օրենքների դեպքում ինչպես է՝   ընդունվում է, մի քանի տարի հետո փոփոխություններ են մտցվում, կիրառման ընթացքում ի հայտ են գալիս թերություններ կամ առավելություններ: Հավանաբար կառավարության այս փոփոխությունների մեջ  նաև այդ գործոնը կա, կրկնում եմ՝ նաև, իհարկե կան այլ գործոններ ևս:

Մարիամ ՊԵՏՐՈՍՅԱՆ

 

 

Հետևեք մեզ նաև Telegram-ում