ԿԸՀ-ն ամփոփել է Երևանի ավագանու ընտրության արդյունքները

Մայիսի 12-ին ՀՀ կենտրոնական ընտրական հանձնաժողովը կազմել է արձանագրություն’ 2013թ. մայիսի 5-ին կայացած Երևանի ավագանու ընտրությունների քվեարկության արդյունքների վերաբերյալ’ հիմք ընդունելով ընտրական տեղամասերում քվեարկության արդյունքների վերաբերյալ արձանագրությունները, վերահաշվարկի արդյունքները, քվեարկության արդյունքների վերաբերյալ ընդունած որոշումները:

Հաշվի առնելով վերոհիշյալ արձանագրությունը, ՀՀ վարչական դատարանի որոշումները, հանձնաժողովներում ստացված դիմումների (բողոքների) քննարկման արդյունքով ընդունած որոշումները, տեղամասային ընտրական հանձնաժողովների գրանցամատյաններում քվեարկության օրն արձանագրված խախտումների վերաբերյալ ընտրատարածքային ընտրական հանձնաժողովների որոշումները, քվեարկության արդյունքների վերաբերյալ ընդունած որոշումները’ ԿԸՀ-ն ամփոփել է ընտրության արդյունքները և ընդունել որոշում’ Երևանի ավագանու անդամներ ընտրվելու մասին:

Համաձայն ԿԸՀ որոշման’ Երևանի ավագանու անդամներ են ընտրվել.
«Բարգավաճ Հայաստան» կուսակցության ընտրական ցուցակից’ Երևանի ավագանու 17 անդամ,

«Բարև Երևան» կուսակցությունների դաշինքի ընտրական ցուցակից’ Երևանի ավագանու 6 անդամ,

Հայաստանի Հանրապետական կուսակցության ընտրական ցուցակից’ Երևանի ավագանու 42 անդամ:

ՀՀ կենտրոնական ընտրական հանձնաժողովի’ Երևանի ավագանու ընտրությունների արդյունքների վերաբերյալ որոշման մեջ նշվում է, որ Երևանի ավագանու ընտրությունների նախապատրաստման և քվեարկության ընթացքում տեղի չեն ունեցել Հայաստանի Հանրապետության ընտրական օրենսգրքի այնպիսի խախտումներ, որոնք կարող էին ազդել ընտրության արդյունքի վրա: Այս մասին նշված է ԿԸՀ տարածած մամլո հաղորդագրության մեջ:

Հիշեցնենք, որ ս.թ. մայիսի 5-ին տեղի են ունեցել Երևանի ավագանու ընտրությունները, որին մասնակցում էին ութ քաղաքական ուժեր: Ընտրությունների արդյունքում վստահ հաղթանակ է տարել ՀՀԿ-ն, որի ընտրական ցուցակն առաջնորդում էր գործող քաղաքապետ Տարոն Մարգարյանը: Անցողիկ շեմը հաղթահարած վերոնշյալ կուսակցություններից զատ ընտրություններին մասնակցում էին նաև ՀԱԿԿ-ը, ՕԵԿ-ը, ՀՅԴ-ն և «Առաքելություն» կուսակցությունը:

Երևանի ավագանու ընտրություններին դիտորդական առաքելություն են իրականացրել մի շարք տեղական և միջազգային կազմակերպություններ: Համաձայն վերջիններիս զեկույցների՝ ընտրությունները կազմակերպված էին բարձր մակարդակով: Որևէ լուրջ թերացումներ կամ խախտումներ չեն արձանագրվել:

Հետևեք մեզ նաև Telegram-ում