Մշակույթի նախարարության հնարավոր կրճատումը լրջագույն խնդիրներ կառաջացնի. հուշարձանագետ
Նմանատիպ
ԵՐԵՎԱՆ, 26 ԴԵԿՏԵՄԲԵՐԻ, ԱՐՄԵՆՊՐԵՍ: Պատմաբան, հուշարձանագետ Սամվել Կարապետյանը դեկտեմբերի 26-ին լրագրողների հետ հանդիպմանն անդրադարձավ ՀՀ մշակույթի նախարարության հնարավոր օպտիմալացմանը և շեշտեց, որ նախարարությունը երկրի ողնաշարը պահող կառույց է, և դրա կրճատումը լրջագույն խնդիր է: «Հույս ունեմ, որ բանականությունը պետք է հաղթանակի, և այդ կառույցը պետք է հզորանա»,- «Արմենպրես»-ի հաղորդմամբ` նշեց Կարապետյանը:
Նրա խոսքով` անկախ պետականության օրոք ցանկացած փոփոխություն պետք է մեկ նպատակ ունենա` ավելի հզորացնել կադրային կառույցները:
«Մենք շրջապատված ենք այնպիսի պետություններով, որոնցից միայն մեկի հետ ենք բարիդրացիական հարաբերությունների մեջ: Իրապես մեր երեք հարևանների հետ էլ մշակութային դաշտում խնդիրներ ունենք: Երկուսը` Ադրբեջանն ու Թուրքիան տասնամյակներ շարունակ բացահայտ վանդալային գործողություններով են զբաղված պետական մակարդակով և բանակի ուժի գործադրմամբ»,-ասաց նա:
Կարապետյանի խոսքով` Խորհրդային Միությունում հուշարձաների պահպանության և օգտագործման գլխավոր վարչությունը նախարարների խորհրդին առընթեր կառույց էր և բարձր կարգավիճակ ուներ, և դա այն ժամանակ, երբ անկախ պետականություն չունեինք:
«1991 թվականին դարձանք անկախ, բայց հանկարծ երկրի ողնաշարը պահող կառույցն իջեցվեց գործակալության մակարդակի. սա անտրամաբանական է: Այս անդեմ վիճակը մեզ վնասում է: Հույս ունեմ, որ մեր ողնաշարը կշտկվի»,-եզրափակեց Կարապետյանը:
Հետևեք մեզ նաև Telegram-ում